நினைவகம்

குறுவறைக்கிறுக்கல்கள்

2011-09-30T18:50:00.001+05:30

(குறுவறை --> Cubicle )

--------------------------------------------------
நீ
அடிக்கடி
என்னைப் பார்க்கிறாய்,
அடிக்கடி
நேரம் பார்க்கிறாய்,
என் இதயம்
ஒரு நொடி நின்றபின்பு
துடிக்கத் தொடங்குகிறது,
உன் கடிகாரம்
சில நொடிகள் தாமதமாய்
ஓடுகின்ற
காரணம் புரிகிறது.

웃
என்
இதயத்திலும்
நான்கு குறு அறைகள் உண்டு.
நான்கிலும்
கணினிக்கு பதிலாய்
கனி நீ.

웃
நீ தட்டும் போது மட்டும்
இசைப்பலகையாய்
மாறிவிடுகிறது,
விசைப்பலகை.

웃
உன்னால் மட்டும் தான்
இப்படி
தினமும்
ஒரே சொல்லில்
கவிதை எழுதிச் செல்ல முடியும்.
வருகைப் பதிவேட்டில்
கையொப்பம்.

웃
தேநீர் இடைவேளைகளில்,
உன் கோப்பையிலிருந்து
தேநீர் பருகும்
உதடு.
உன் உதட்டிலிருந்து
தேநீர் பருகும்
கோப்பை.
------------------------------------------------

♥ கவிதைக்கூடம் ♥

2011-02-24T19:41:00.009+05:30

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

♥ஆய்வகத்துக்குள்

நுழையும் முன்பே,

ஆய்வு செய்யத்

துவங்கிவிட்டேன்.

உன்னை.

♥ என்னருகில் வந்து

திருகு அளவியின் புரியிடைத்தூரம் பற்றி

கேட்கிறாய்.

எனக்குத் தெரிந்தது எல்லாம்

வெறும் 'இடை'த்தூரம்தான்.

♥உன் கன்னக் குழியாடியின் மேல்,

என் முத்தங்களின் குவியதூரம் எவ்வளவு?.

♥ ஊசலின் அலைவு நேரத்தைக் கவனிக்கும் நீ

ஊசலாடும் என் இதயத்தையும் கொஞ்சம் கவனி.

♥தவறாமல்

தவறான திசையையே

காட்டுகிறது.

காந்த மானி.

உன் காந்தக் கண்களை

வேறு பக்கமாய்த் திருப்பு.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

கவிதை விதை விதைத்தவள்..

2010-10-07T20:14:00.014+05:30

`````````````````````````````````````````````````````````````````````````````````````````````````````````

௧. ஒரே ஒரு விதைதான்

நீ விதைத்தாய்.

கணக்கற்ற கவிதைகள்

முளைக்கின்றன

என்னுள்..

௨. உன் சேலையின் நீளத்திற்கொரு

கவிதை இயற்றினேன்..

தலைப்பு மட்டும் கிடைக்கவில்லை.

கொஞ்சம் கொடேன்.

உன் சேலைத் தலைப்பை...

௩. இவ்வளவு அழகாக

கவிதை எழுதிப் போகிறாய்.

திசுத்தாளில் உதட்டுச்சாயம்..

௪. நான் என்ன எழுதினாலும்

அது கிறுக்கலாய் முடிகிறது.

நீ என்ன கிறுக்கினாலும்

அது கவிதையாய் முடிகிறது..

௫. நீ எப்போதும்

என்னுடன் இருக்க வேண்டும்.

நான் கவிதை எழுதும் நேரம் தவிர.

நீ அருகே இருந்தால்

எனக்கு பேச்சே வராது.

கவிதை மட்டும் எப்படி வரும்?.

௬. உன் பிறந்தநாளில்

நான் எழுதிய கவிதையொன்று..

" பூமியில் வாழும் நிலவொன்று

இருபத்து மூன்றாவது முறை

சூரியனைச் சுற்ற கிளம்பிய தினம்"

``````````````````````````````````````````````````````````````````````````````````````````````````````````

நீ - மழை நேர மழலையடி

2010-07-23T19:07:00.005+05:30

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

மரம் சேகரித்து வைத்த

மழைத்துளிகளால்

நீ நனைந்து

சிலிர்ப்பதைக் காண

காத்திருக்கிறேன்.

மரத்தடியில் ...

நீ மரத்தருகே

வருவதைக் கண்டதுமே

சிலிர்த்தது என்னவோ

மரம்...

நனைந்தது

என்னவோ

நான் தான்...

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

உன்னை போலவே தான்

எனக்கும்,

மழை நின்ற பின்

யூகலிப்டஸ் மரச்சாலையில்

நடந்து செல்லப் பிடிக்கும்.

உன்னை போலவே தான்

எனக்கும்,

மழை வரும் போது

காகிதக் கப்பல் செய்து

விளையாடும்

மழை நேர மழலையாய்

மாறப் பிடிக்கும்...

உன்னை போலவே தான்

எனக்கும்,

மழை நேரத்தில்

சாலையைக் கடந்த

தவளைகளைப் பிடிக்காது...

ஆனால்

இடி மின்னலோடு

மழை பெய்கையில் மட்டும்,

உன்னைப் போல

காதைப் பொத்தி

"அர்ஜுனா அர்ஜுனா"

என்று நான் கூறுவதில்லை...

மாறாக,

உன் பெயரைத்தான்

உரக்கக் கத்துவேன்....

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

பாத்திரங்கள்..

2010-07-01T13:10:00.014+05:30

.........................................................................................................

பாத்திரங்களையெல்லாம்

சுத்தம் செய்து வைக்கும்

பாத்திரமாக

அக்கா ..

சாப்பிட்ட பாத்திரங்களைக் கூட

கழுவாமல்

அப்படியே எறிந்துவிட்டுச்

செல்லும் பாத்திரம்

நான்...

எவ்வளவு கஷ்டத்திலும்

வீட்டுப் பாத்திரங்களில்

உணவுக்கு குறை இன்றி

குடும்பத்தை காக்கும்

பாத்திரமாய் அப்பா...

மழை வரும் போது

வீட்டில் ஒழுகும் இடங்களில்

ஓடிச் சென்று

பாத்திரங்களை வைக்கும்

பாத்திரம்

அம்மா ...

........................................................................................................

குறுந்தகட்டுக்கிறுக்கல்கள்-5

2010-06-15T09:07:00.005+05:30

Thanks to flickr.com

~~~~~~~~~~~~~~~~~~~~~~~~~~~~~~~~~~~~~~~~~~~

கடைசி நேரத்தில் வந்து

காற்றில் வரைந்து

சொல்லிவிட்டுப் போனாய்.

பிளெமிங் இடக்கை மற்று வலக்கை

விதிகளை..

நானும்

நீ சொன்னதை

பிழையின்றித் தேர்வில்

எழுதி விட்டு வந்தேன்..

இடக்கை விதியை

வலக்கை விதி என்றும்

வலக்கை விதியை

இடக்கை விதி என்றும்

~~~~~~~~~~~~~~~~~~~~~~~~~~~~~~~~~~~~~~~~~~~

முகநக நட்பாம்...

2010-05-20T08:42:00.010+05:30

___________________________________________________________________

வீட்டில் பணத்தைத் திருடியதால்

தன்னோடு யாரும்

முகம் கொடுத்துப் பேசுவதில்லை

என்பதை தலைகுனிந்து,

கண்கள் குளமாக

அவனிடம் சொல்லிகொண்டிருந்தான் ...

இவன் ,

இடக்கை

அவனை அறியாமல்

இவனைத் தேற்றியது...

வலக்கை

இவன் அறியாமல்

சட்டைப்பை பணத்தை

தொட்டுப் பார்த்தது ..

___________________________________________________________________

குறுந்தகட்டுக்கிறுக்கல்கள்-4

2010-04-21T18:52:00.009+05:30

`````````````````````````````````````````````````````````````````

இனிமேல்
தேர்வு சமயங்களில்
உனது புத்தகங்களை
நான் இரவல் வாங்கமாட்டேன்....

பின்னென்ன..
இரண்டு நாட்களாக
உன் பெயர் பொறித்த
முதல் பக்கத்தையே நான்
வெறித்துக் கொண்டு இருந்தால்
மற்ற பக்கங்களை எப்போ
முடிப்பதாம்..
`````````````````````````````````````````````````````````````````

வேலை தேடும் வேலை(ளை)யில் ...

2010-04-16T00:46:00.010+05:30

மூடிய கண்களின் மேல்

சிவப்பாய் ஏதோ தெரிய..

விழித்துப் பார்த்தால்

அன்றைய தினம்

என்னை எழுப்ப வந்த

நண்பன் சூரியன்....

எழுந்து பார்த்தால்

சமையலறையில்

மூன்று வேளைச் சோறு மட்டும்

என்னைப் பார்த்துப்

பல்லிளிக்கிறது ...

வயிற்றுக்கு உணவு செல்லாத

நிறைய வேளைகளில்

செவிக்கு உணவு தந்தன

ஊர் நூலகமும்,

உலவு மையங்களும்,

சில சமயங்களில்

சும்மா என்கிற

சாதாரண வார்த்தையை

எடுத்து கூர்தீட்டிக்

குத்திக் காட்டினார்கள்

சுற்றத்தார்கள்....

யாருமற்ற பகல்கள் மட்டும்

மெதுவாக இரவை நோக்கி

நகர்ந்தது

யாவரும் உள்ள இரவுகளோ

வேகமாக விடியலை நோக்கிச்

சென்றது...

பிறகு,

மூடிய கண்களின் மேல்

சிவப்பாய் ஏதோ தெரிய....

............................................

கோலக்கால கோலாகலம்

2010-03-29T16:32:00.015+05:30

~~~~~~~~~~~~~~~~~~~~~~~~~~~~~~~~~~~

1. மார்கழி மாதத்தில்,

தினமும் அதிகாலை,

5லிருந்து 6 மணி வரை ,

காணத் தவறியதில்லை,

உன் கோலங்கள்....

என் மொட்டை மாடித்

தொலைவுக் காட்சியில்...

~~~~~~~~~~~~~~~~~~~~~~~~~~~~~~~~~~~

2. பூகோளத்தை ஆய்வு செய்யும்

தொழில் என்னுடையது..

சில சமயங்களில்

பூக்கோலத்தையும் ஆய்வு செய்ய

வைக்கிறாய்...

~~~~~~~~~~~~~~~~~~~~~~~~~~~~~~~~~~~

3. அரிசி மாவெடுத்து

நீ வாசலுக்கு வந்ததும்..

அரசிதான் மாவெடுத்து

வந்ததாய் எண்ணி

வரிசையில் வந்து

நிற்கின்றன

இந்த எறும்புகள்....

~~~~~~~~~~~~~~~~~~~~~~~~~~~~~~~~~~~

4. வாசலில் மட்டுமின்றி

உள்ளங்கையில் கூட

அழகாகக் கோலமிடக்

கற்று வைத்திருக்கிறாய்..

~~~~~~~~~~~~~~~~~~~~~~~~~~~~~~~~~~~

5. எந்தக் கோலத்தில் உன்னைப்

பார்த்தாலும்

அழகாகவே தெரிகிறாய்.

குறிப்பாக,

அந்தக் கோலம் போடும்

கோலத்தில் மட்டும்

கொள்ளை அழகு...

~~~~~~~~~~~~~~~~~~~~~~~~~~~~~~~~~~~

குறுந்தகட்டுக்கிறுக்கல்கள்-3

2010-03-17T17:21:00.009+05:30

<><><><><><><><><><><><><><>

ஒரு மாத காலமாக

தேர்வுக்குப் படித்தவற்றை

இப்படியா

ஒரு நொடியில்

மறக்கடிப்பாய்...

தேர்வறை முன்பு

ஆல் தி பெஸ்ட்

என்று சொல்லி...

<><><><><><><><><><><><><><>

உன் பேச்சும்

சிரிப்பும்

எப்போதும்

எதிரொலிப்பதே இல்லை...

தடைகளில் பட்டுத்

திரும்பினால் சரி..

தடைகளே விரும்பி

வைத்துக்கொண்டால் ?....

<><><><><><><><><><><><><><>

பவானி சாகர் அணை

2010-02-19T14:03:00.006+05:30

1. அணையின் அளவீடுகள்..(நல்ல caption உடன்...)

2. மாலை நேர வானவில்...அணைப் பூங்கா.

3. அணைப் பூங்கா

4. பவானி ஆற்றின் தொடக்கம்...

5. அணையின் ஒரு பகுதி

6.மறுபக்கம்.

7. அணையின் முகப்பு..

8. நட்புக்காக

வெட்கம்-வரையறை.

2010-02-15T10:11:00.002+05:30

நன்றி : யூத்புல் விகடன்..

1. நான் பார்க்கும் போதெல்லாம்

உன் உண்மையான முகத்தை

அடிக்கடி வந்து

மறைத்துக் கொள்வதே...

இந்த வெட்கத்தின் வேலை...

2. தரை உரசும்

உன் கால் பெருவிரல்..

பற்களை மறைத்துப்

புன்னகைக்கும் உன் இதழ்..

கையில் சிக்கிய காகிதத்தை

துளித்துளியாய் பிய்த்து எறியும்

உன் கை விரல்கள்..

நான் பார்க்காத தருணங்களில்

என்னை பார்க்கும் கண்கள்...

மென்மையான சிரிப்பிலும்

குழி விழும் கன்னம்...

இவற்றில் எங்கு ஒளித்து வைத்திருக்கிறாய்?

உன் வெட்கத்தை..

(வெளிவராமல் போன கவிதை..)

3.உன் வீட்டுக்கு

நான் வரவேண்டுமெனில்,

நீ வெட்கத்தை எல்லாம்

மூட்டை கட்டிவிட்டு

தோழி வேடம் ஏற்க வேண்டும்..

அப்போது

நீ மூட்டை கட்டும் வெட்கங்களை

கொஞ்சம் கவனமாகப் பார்த்துக்கொள்...

சில சமயங்களில் தப்பிச்சென்று

உன் தங்கை முகத்தில்

ஒட்டிக்கொள்கிறது....

ஜன்னல் குறிப்புகள்

2010-02-01T12:56:00.002+05:30

# உன் முகத்தை
முதலில் எனக்கு
அறிமுகம் செய்தது
ஜன்னல்....

# தொலை தூரப்

பேருந்துப் பயணங்களில்

நீ என்னை விட

அதிகம் நேசிப்பது

ஜன்னலை..

# பேருந்தில் நீ

ஜன்னலோரம்

அமரும்போதெல்லாம்

என் கால்கள்

அனிச்சையாய்

சாலையோரம் வந்துவிடுகிறது..

# உனக்கு பிடிக்காத

புடவைகள் மட்டும்

ஜன்னலுக்குப் பிடிக்கிறது..

ஜன்னல் திரையாய்

# உனக்கு பிடித்த

புடவைகள் மட்டும்

ஜன்னலுக்குப் பிடிப்பதில்லை..

ஜன்னலையொட்டி நீ

நடக்கையில் கம்பியில்

பட்டு கிழித்துவிடுகிறது

# நான் உனக்கு

அளித்த கவிதைகளை விட

ஜன்னலுக்கு அளித்த(எறிந்த)

கவிதைகளே

அதிகம்...

வலைச்சரத்தில்....

2010-01-29T18:43:00.005+05:30

<><><><><><><><><><><><><><><><><><><><><><><><><><><><><><><><><><><><><><><><><><><><><><><><><><>

ஜனவரி-11 , அன்று வலைச்சரத்தில் இரும்புத்திரை என்னை அறிமுகம் செய்திருந்தார்.

http://blogintamil.blogspot.com/2010/01/blog-post_4557.html

<><><><><><><><><><><><><><><><><><><><><><><><><><><><><><><><><><><><><><><><><><><><><><><><><><>

நன்றிகளுடன்,

மாரிமுத்து

மறந்து விடாமல்...

2010-01-24T10:17:00.007+05:30

ஜன்னலோர

இருக்கையில்

அமர்ந்தபின்னும்

கவனம் வெளியே

சிதறாமல் இருந்தது அன்று...

கையில் திணிக்கப்பட்ட

பயணச்சீட்டின் பின்புறம்

எழுதியிருந்த

மீதிச் சில்லறை....

இடஞ்சுட்டிப் பொருள் விளக்கம் தருக...

2010-01-21T09:29:00.007+05:30

----------------------------------------------------------------------------------------------------------------------------------

படம்: தமிழ்படம்.

இசை: கண்ணன்.

பாடலாசிரியர்:சந்துரு, அமுதன்

பாடியவர்கள் : ஹரிஹரன், ஸ்வேதா மோகன்.

---------------------------------------------------------------------------------------------------------------------------------

ஓமகசீயா ஓஹோமகசீயா...

நாக்க முக்க நாக்கா

ஒ ஷக்கலாக்கா

ஓஹோ ரண்டக்கா...

உல்லாஹி உல் லாஹி

ஆய கயாஹி யாஹி...

மேஹூ மேஹூ

டைலாமோ டைலாமோ

ரேஹத்துல்லா சோனாலியோ...

சாம்ப சம்பாலே உசூசே

சாயோ சாயோ

ஹசிலீ பிசிலீ இலாஹி

யப்பாஞ்சிப்பா

டைலாமோ டைலாமோ

பல்லேலக்கா...(நாக்க முக்க..)

ஏ சல சாலா இசக்குபராரா

ஒசக்குமுறாயா

பூம்பூம்சகாக்கா

முக்காலா மையா மையா..

லாலாக்கு லாலாக்கு

டோல் டப்பி மா...(நாக்க முக்க..)

சூரிய கிரகணம்

2010-01-19T13:13:00.007+05:30

The pin hole projection method மூலம் கங்கண (annulur) சூரிய கிரகணத்தைக் கண்டு களித்தேன்...

எங்கள் வீட்டு மொட்டை மாடியில் வேயப்பட்டிருந்த தென்னங்கீற்றுக் கூரையின் வழியே தரையில் விழுந்த பிம்பங்கள் இதோ....

சிட்டாளு...

2010-01-11T22:28:00.015+05:30

கருக்கு வச்ச அருவா

கையில எடுத்துட்டு

கெளம்பிடுவ நெல் அறுக்க,

முறுக்கு தின்ன ஒருவா

பொஸ்தகப்பையில வச்சிட்டு..

சோத்துப் போசியில

நான் சுடுசோத்தப் போட்டுட்டு

பொட்டி தேப்பேன் எஞ்சட்டய,

பள்ளிகோடம் போறதுக்கு,

என் புதுசட்டயில பிச்செறிஞ்ச

குண்டூசிக் கம்பியெல்லாம்

நாம்பாத்தேன்

உன்செருப்பு வாரு மேல....

மழைத்தண்ணிய நான் பாத்தேன்

ஊட்டுக்குள்ள ஒழுகுறப்போ

ஒங்கண்ணுல ..

நீ

மஞ்சக் காட்டுல பூடு பறிச்சு

மாட்டுக் கொட்டாயில சாணி வழிச்சு

கரும்புத்தோகையுரிச்சு

நடவு நட்டி

நான் முழுசா

எட்டாங்கிளாஸ் படிக்கறதுக்குள்ள

பாதியாய் சுருங்கிப்போனே.

போதுமாத்தா நாம்படிச்சது

போகாதே இதுக்கப்புறம் வேலைக்கு,

கால் வயிறு

தின்னாலும் உங்கையாலே

திங்க வேணும்....

இப்ப நாஞ்சிட்டாளு

நாளைக்கு எனக்கு

கீழ எட்டாளு

சாமி மேல சத்தியமா

எனக்கு எந்த வெசனமுமில்ல,

பள்ளிக்கோட புள்ளைகளெல்லாம்

என்னைத்தாண்டி போகுறப்ப

கண்ணு மட்டும் துளிவேள

கலங்கிடும்...

சித்த நேரத்துல

தெளிஞ்சுடும்......

--------------------------------------------------------------------------------------------------------------------------------------

(உரையாடல் அமைப்பு நடத்தும் கவிதைப் போட்டிக்காக எழுதப்பட்டது )

-----------------------------------------------------------------------------------------------------------

குறுந்தகட்டுக்கிறுக்கல்கள்-2

2010-01-10T10:35:00.005+05:30

நீ

புல்லாங்குழல்

வாசிக்கிறாய்...

செவிகளில்

தேன் பாய..

புல்லாங்குழலிலும்

தேன் பாய...

யாரிவன்?....

2009-12-24T17:08:00.011+05:30

ஒரு சுய சேவை சிற்றுண்டி

உணவகத்தில்,

தேவையான உணவினைத் தாங்களே

வாங்கிக்கொள்ள வேண்டும் என்பது

தெரியாதது போலவும் ,

கால் மேல் கால் போட்டுக்கொண்டும்,

சுற்றும் முற்றும் பார்த்துக்கொண்டும்,

காத்துக் கொண்டும் இருந்த

அந்த பெண்ணைப் பார்க்க

பாவமாய் இருந்ததால்,

அருகில் சென்று

"இங்கு பணியாட்கள் இல்லை"

என்ற பலகையை நான் சுட்டிக்காட்ட,

உடனே அவள்,

யார் சொன்னது என்பதுபோல

ஒரு நமட்டுச் சிரிப்போடு

வேறு திசையில் கை காட்ட,

அங்கே

வேர்த்து விறுவிறுத்து

உணவினை எடுத்துக்கொண்டு

இருகைகளிலும் தூக்க முடியாமல்

செயற்கைச் சிரிப்புடன்

அவளை நோக்கி நடந்து

வந்தவனைப் பார்த்தவுடன்

தெரிந்து கொண்டேன்.

அவளின் கணவனாக

இருக்குமென்று.....

-----------------------------------------------------------------------------------------------------------------------------
சுயசேவை உணவகம் - self service hotel

-----------------------------------------------------------------------------------------------------------------------------

மின்கவிதை..

2009-12-18T12:50:00.018+05:30

வலைப்பதிவில்

கவிதையொன்றை

எழுத முயன்றுகொண்டிருந்தான்..

சட்டென மின்னரட்டையில்

வந்தார், அமெரிக்க மேலாளர்..

What is the status Mr.? என்றார்...

பட பட வென்று கைகள்

பதிலளிக்கத் தொடங்கின..

The

Development

activity

going

on Sir ....

சட்டென ஒட்டிக்கொண்ட பாடல்...

2009-12-16T14:11:00.016+05:30

--------------------------------------------------------------------------------------------------------------------------------------

படம்: கந்தக்கோட்டை.

இசை: தீனா.

பாடலாசிரியர்:விவேகா

பாடியவர்: நகுலன்

----------------------------------------------------------------------------------------------------------------------------------------

Drag from here

இரு சக்கரவாகனமாக அவளது விழிகள்

விபத்தாகி விழுந்தது ஏனோ எனதிரு விழிகள்

அவள் புருவத்தை சாய்த்துப் பார்க்கவில்லை

புன்னகையில் ஒரு மாற்றமில்லை

கால் விரலால் நிலம் தோண்டவில்லை

கடந்தபின் திரும்பி சிரிக்கவுமில்லை

எப்படி என்னுள் காதல் வந்தது

எச்சில் உணவு கொடுக்கவில்லை

எனக்காய் இரவில் விழிக்கவில்லை

பார்த்ததும் ஆடை திருத்தவில்லை

பாஷையில் முனைகளை சேர்க்கவுமில்லை

எப்படி என்னுள் காதல் வந்தது

என்னைப் பார்த்ததும் குழந்தையைத் தூக்கி முத்தம் கொடுக்கவில்லை

என் பேர் கேட்டதும் கன்னங்கள் இரண்டும் சிவந்துப்போகவில்லை

என் தெருவில் அவள் அடிக்கடி தினுசாய் திரிந்து பார்த்ததில்லை

என்னிடம் எதுவும் பிடித்ததுபோல புகழ்ந்து உரைத்ததில்லை

ஆனாலும் …. ஆனாலும் … ஆனாலும் . .

எப்படி என்னுள் காதல் வந்தது

அதை என்னிடமே தான் கேட்கத்தோணுது

என்னிடம் உள்ள கெட்டப்பழக்கத்தை தட்டி கேட்டதில்லை

சாப்பிடும்போது அவளை நினைத்து நான் தும்மல் போட்டதில்லை

அவள் கனவில் நானும் வந்து போனதாய் எந்தச் சுவடுமில்லை

ஒரு நாள் கூட நள்ளிரவில் குறுஞ்செய்தி வந்ததில்லை

ஆனாலும் …. ஆனாலும் … ஆனாலும் . ...

எப்படி என்னுள் காதல் வந்தது

அதை எப்படி நான் போய் சொல்வது

[அவள் புருவத்தை ...]

Stop Dragging

--------------------------------------------------------------------------------------------------------------------------------------

கலைத்தல்....

2009-12-14T11:23:00.014+05:30

கடல் நுரைகள் மட்டும்

கண்ணுக்குப் புலப்படும்

ஓர் அதிகாலை நேரத்தில்,

நாலா பக்கமும்

ஓர் அரையிருள் வெறித்த

கடலோர மணலில்,

மடக்கி வைத்திருந்த காலை

நீட்ட முடியாமலும் ,

உள் சென்ற உப்புக்

காற்றை சுவாசிக்க

முடியாமலும் ,

நிசப்தத்தை கிழித்துவிட்டு

எழும் கடலலையின்

சீற்றத்தால் வந்த

பயத்தை போக்க முடியாமலும் ,

அவ்விடத்தை விட்டு

அகல நினைத்தவனின்

இடுப்பு வரை

உப்பு நீர் சூழ ,

உணர்விழந்து போன

கால்களால்

நிலை தடுமாறி

நீருக்குள் அமிழ ,

நுரையீரல் நுண்ணறைகளை

நீர் ஆக்ரமிக்க ,

மூச்சுத் திணறி

சாகத் திரிந்தவன் ,

சட்டென எழுந்தான் ....

முகத்தில் மூடிய

போர்வையை தூக்கி

எறிவதற்காகவும் ,

குறுக்கிய கால்களை

வேகமாய் நீட்டுவதற்காகவும் ,

ஈரமான ஆடையை

மாற்றுவதற்காகவும்.....

--------------------------------------------------------------------

பிறந்தநாள் பரிசு

2009-12-07T09:55:00.008+05:30

------------------------------------------------------------------------------------------------

வெற்றிலையை எடுத்து
காம்பைக் கிள்ளி
கையில் வைத்துக்கொண்டு
என்னைத் தேடிய அமத்தா..

அழுகின்ற என்னைத் தேற்ற
அம்மாவிடம் பொய்யாய் அடிவாங்கி
பொய்யாய் அழுது என்னை
சிரிக்க வைத்த அண்ணா....

நான் கழற்றி வைத்த
சட்டைப் பையில்
பீடிக்கும் டீக்கும் உரிமையோடு
காசு துழாவும் அப்பா....

வயிறு எவ்வளவு வளர்ந்தாலும்
ஏண்டா இளைச்சுட்டேன்னு
கூசாமல் கேட்கும் அம்மா...

நீங்கள் எல்லாம் என்னை
வழியனுப்பிவிட்டு திரும்பும்போது
எனக்குத் தெரியாமல்
உங்கள் கண்களில் இருந்து
வந்த ஒரு சொட்டு
கண்ணீர்த்துளியில் இருந்து
எடுத்துக்கொண்டேன்

என் பிறந்தநாள் பரிசை..

-------------------------------------------------------------------------------------------------

பேருந்து தினம்

2009-11-30T18:19:00.014+05:30

அன்று பேருந்து தினம். ,
தேர்வைக்கூட கண்டுகொள்ளாமல்
கொண்டாட நினைத்த தினம்.....

நாயகி பேருந்துக்கு
காகிதப்பூ அலங்காரம்,
பூக்கடை நண்பன் தயவில்
ஒரு குறைந்த விலை
பேருந்துயர மாலை,
பிறகு என் கைவண்ணத்தில்
உருவான முப்பரிமாண
எழுத்துக்களாலான முகப்பு அட்டை....

நாயகனுக்கு ஒரே ஒரு,
வெள்ளைப் புத்தாடை.....

பேருக்கு, ஒரு கோவிலில்
பூஜை செய்த பின்,
"மன்மத ராசா" வின் இசையோடு
ஒத்திசைவாய் குலுங்கியபடி
நகர்ந்தது பேருந்து......

எங்கள் ஆட்டத்தை
ஒரு தமிழ் நாடு அரசு
கடுப்போடு வெறித்துவிட்டு
புகையை கக்கிக் கடந்து போக,
கடுப்பான நம் நாயகன்,
அதி வேகமாய் அரசைக் கடக்க முயல,
புகையில் தொடங்கியது

ஒரு பகைப் போட்டி...

போட்டியின் நடுவே ஒரு
பைக் குறுக்கே பாய
நாயகன் பயத்தில் ஓரங்கட்ட
நிலை தடுமாறிச் சாய்ந்தது
சாலையோரப்பள்ளத்தில்..

ஆடிக்கொண்டு வந்த நாங்கள்,
அமைதியாய் வெளியேற முயல,
ஆடாமல் வந்த பெண்கள்
கூச்சலிட்டே வெளியே வர
வந்தமர்ந்தோம் சாலையோரம்...

யாருக்கும் உயிர்ச்சேதம்
இல்லையெனத் தெரிந்தபின்பு
தொடங்கியது மறுபடியும்
குத்தாட்டம் நடு ரோட்டில்...

உயிர்பிழைத்ததற்காக அல்ல...
எங்களோடு பயணிக்காமலே
மடிந்து போன அன்றைய

கணிதத்தேர்வுக்காக...

-------------------------------------------------------------------------------------------------

காதலை விட்டு வெளியே வந்து, என்னால் முடிந்த வரை "Enter " பட்டனைத் தட்டி தட்டி வடித்த வரிகள் இவை...குறையிருந்தாலும், நிறையிருந்தாலும் மறக்காமல் கருத்துரையில் தெரிவிக்கவும்..

-------------------------------------------------------------------------------------------------

குறுந்தகட்டுக்கிறுக்கல்கள்-1

2009-11-19T12:33:00.005+05:30

------------------------------------------------------------------------------------------------

பணத்துடன்

தொலைந்து போனது,

என் பணப்பை.

பணம் போன வருத்தத்தில்

நான்...

நீ தந்த ஒற்றை நாணயம்

போன வருத்தத்தில்

என் மனம்....

-------------------------------------------------------------------------------------------------

நம் தேர்வு முடிவுகள்
அறிவிப்பு பலகையில்,
என் விரல் தேடியது
என் பெயரை,
என் விழி தேடியது,
உன் பெயரை....

-------------------------------------------------------------------------------------------------

நீ என்னைப் பார்த்து
கண் சிமிட்ட
நினைக்கிறாய்.
நான் அதை பார்த்து
கண் சிமிட்ட
மறக்கிறேன்....

-------------------------------------------------------------------------------------------------

நீ
பறித்து,

அரைத்து,

பூசிக்கொண்ட

மகிழ்ச்சியில்,

குளிர்ந்து போனது,
மருதாணி.....

-------------------------------------------------------------------------------------------------

அகத்தின் அழகு
முகத்தில் தெரியுமாம்.
யார் சொன்னது.
உன் முகத்தின் அழகுதான்
எப்போதும் என்
அகத்தில் தெரியும்.....

-------------------------------------------------------------------------------------------------

[எங்கே என்னைப்பார்த்து யாராச்சும் "யாருமே இல்லாத வலையிலே யாருக்காகடா எழுதுறேன்னு " கேட்டு விடுவாங்களோ என்று பயத்துடன் பதிவை தொடங்கினேன். ] சென்ற பதிவில் நான் எழுதிய கவிதையை பாராட்டி, என்னை ஊக்கப்படுத்திய அனைத்து (மூன்று) அன்பர்களுக்கும் நன்றி. என் கல்லூரி காலத்தில் கிறுக்கியவற்றை இங்கே பதித்துள்ளேன். கோச்சுக்காம படிங்க....

நன்றி: இணைய தளம் (படங்களுக்காக)

-------------------------------------------------------------------------------------------------

சேறு

2009-11-12T12:46:00.006+05:30

-------------------------------------------------------------------------------------------------

------------------------------------------------------------------------------------------------

நீ இரவாடை அணிந்து,
வீட்டைப் பெருக்கும் பொழுதும்...
ஜன்னலோரப் பேருந்தில்,
உன் ஆடையோடு
காற்றுவிளையாடும் பொழுதும்...

மழை நீரில் நீ ஆடையைப் பிடித்து

நடக்கும் பொழுதும்...
எப்படியோ வந்து
என் மனதில்

அப்பிகொள்ளும்,

சேறு...

-------------------------------------------------------------------------------------------------

" சென்ற வாரம் பெய்த மழையால், நான் தங்கி இருந்த பகுதி முழுதும் சேறானது. இந்த சாலையில் தான் தினமும் நான் நடந்து அலுவலகம் செல்ல வேண்டும் .. செல்லும் வழியில் தோன்றிய ஒன்று....
-------------------------------------------------------------------------------------------------

வித்தியாசமா ஒரு வித்தியாசம் கண்டுபிடிப்போம்...

2009-11-04T18:16:00.000+05:30

இப்ப கண்டு பிடிக்க முடியாது!!! கொஞ்ச காலம் பொறுத்து இருப்போம்.!!!

பசுமை வயல்.......கரட்டடிபாளையம்.

2009-10-26T18:04:00.006+05:30

-------------------------------------------------------------------------------------------------

எம் பாரத அன்னையின்
பச்சைப் பட்டாடையில்
ஓர் ஒற்றை நூல்...
பசுமை வயல்-கரட்டடிபாளையம்..

-------------------------------------------------------------------------------------------------

ஊருக்கு சென்ற பொழுது "கிளிக்'கியவை........................

'திடுதிடுப்பு'ன்னு சொல்லுவோம்....

வாய்க்கால்.

வாய்க்கால்.

29-06-1999

2009-10-22T16:42:00.002+05:30

பிதாகரஸ் துயரம்!!!! (சாரி தியரம்)

2009-10-12T18:43:00.001+05:30

பொழுது போகாம இருந்தப்போ , எம்.எஸ்.பெயின்ட் ல ஏதோ இந்த மாதிரி ஒரு படம் வரைந்தேன். வரைந்த பின் தான் தெரிந்தது, நான் என்னை அறியாமலே பிதாகரஸ் தியரத்தை வரைந்திருக்கிறேன் என்று.....................

இது ஒரு சோதனைப் பதிவு...

2009-10-01T11:49:00.001+05:30